Galatians 5

Kristi Ku Yi Ze Aza Lo-loiya

1Ntu cenu, Kristi la yi loya. Fye ku kpe ɓehin-hin, ge fye filo n yanci ye to fya je fyehin pa fi n na Yahudiyi aɓokni n na knunu yin. 2Fye kna tnubua, ntuge ɓeye zhin ɓo dnagmai nu, ngye fye ye kpe lo n Kaciya zhin nu n na Yahudiyi awyidna bwa shi yi nu ɓa ze fya aza manayi n Shekwoyi abye, agye Kristi ta mi wa gni fyen. 3Mi ɓa je ce da, oza n wa zhin atna wa bwa Shekwoyi bugba da ntu n kaciya ɓo n na Yahudiyi awyidna bwashi yi tile wa vi ɓa ɓo kni vinya kwo kuwa wa bwi. 4Kristi to n na pmayi lo nfye aba n, ndei fye gye ge fye ɓa ku ta zo Shekwoyi gbanu kpa n na wyidna bwa-shi yin; fye ku bwi n Shekwoyi alheri aba.

5Ama, dna n Zafun Gyi-gyi-yi bma-zhin yi kpe ma Kristi ʼfi nu, wa kuyi alaifi ya, wa ze yi aza manayi n Shekwoyi aba. 6Eyi, n Kristi la wye-wyei nyalo-nyalo nya gayi nyi, yi to n na apmai lo ya damu kwo yi kaciya yi zhin lon, ko yi shi a Yahudiyi awyidna bwa lon, ntuge nya n yi ye kwonu zhin gaiciya ga tnu-tnu dna n ye-ye.

7Fye ɓei zan-zan cewo, nykado nu la ɓo dna fye do, to fyei ɓa shan gaiciya vi ma? 8Shekwoyi nu to wu fye lonun, ntuge owo nu na yi fye woi lo fye ya dna Kristi. 9“Ama zanukwoyi gmanyi nu, n fye mi n wa wun fye ya.”

10Mi kpe ma Dagayi nu wa je fye ze ɓe cei, fya vi a ɓeye shi mi vnyi. Shekwoyi ɓa zhin n zahi yi, kwo nyikadona n wo dami n fyei woi dna fye kwoce nyi.

11Azaho gnalo ge, mi zhin kaciya, n na Yahudiyi awyidna yi waʼazi lo, nge ɓa zhin ɓe shi-shi-yi nu n gni-gni zokwo. To, ngye mi zhin cenu waʼazi, ata shan mi wahala gan, ntuge waʼazi ye ta kni zaho-zahoi bugban. Wahala n na ga mi nyi kwa wu nu ge, mi zhin gni-gni dna n gaiciya ga n Kristi zundu gmanyi nu waʼazi.

12Mi cei pma lo, a malami nɓa dami n fyei nge fye sa fye nayi ya n kaciya yi, ɓa ɓa ka n fye to ɓaye zhin dmi n fyei m.

13Emazaje, ala loloya ga fye, to ge loloya fya zhin ɓenukwo yin, ama loloya fya ye na jei fya bma je zhin. 14Gama owa vinya dna n wyidna gmanyi ye, “Fye ye na zajei, shi fye ye n fyehin tukwoyi,” 15Ama ndei maimakon fye wu ye-ye, fye ce fyei wu anya n na jei, fyei wun aje nu, fye zhin peceiye. Fye zhin peceiye n na jebwi yi.

Vi Zafun Ɓo

16Mi ga fye shaula, fye vi Zafun Gyi-gyi-yi ɓowu nu, wo ɓa gna fye aba nfye ɓa lo n nyai n fye ɓa zhin, n lonu fye ta zhin ɓenukwoyi zhin nfye nayi nukwoyi ye fya zhin. 17Gama yi gna ye ya zhin ɓo n yi nayi a gnayi ge yi zhin, gbo n nyai n Zafun Gyi-gyi-yi ye ya zhin. Anya manayi n Zafun ye ya zhin ɓa wu gbo n nyai n nayi ye ya zhin. Anya deye ngun aba n ɓafi n yi nayi nyi, ɓa sunkun na jei n na bai ɓa gyi nasara n yi tukwo, ɓai gna ya ɓomwi gna-gna. 18Sanu Zafun Gyi-gyi-yi wa wu fye zokwo fye to n apmai lo fyavi a Yahudiyi aɓeknin.

19Ama nfya vi fyehin ɓeye, fye ɓa zhin aɓenukwoyi ye, aɓonubozhin nukwoyi, shakpe nukwoyi aɓo awyeda nya. 20Shangba, alijanu bauta zhin, aza wyegbaci n ɓa to zhin honyan, nuwun n gusun yi, eshe n minagyi yi, n atnazhin yi. 21Eshe anya pwawo nya, zawu, jesin, n na wyefan kasa yi, n na ɓe deye pyai vinya. Ma gna fye njesun shi mi ɓei shin fye gna, oza n wo zhin aɓeye vinya wo ta lo Shekwoyi bemin.

22Ama, n Zafun Gyi-gyi-yi nu gyi be tu n yi tukwo wo ɓa ɓe n na aɓeye pyai n yi mi. Yeye, bugba-buyi, bugba fu, hakuri azaye n cei ɓemana zhin. 23Ɓefyece, zawanshi, peceiye. Aɓeye vinya ta zhin gaba lo na Yahudiyi aɓeknin yin.

24Aza nɓa zhin Kristi nya ɓa ku nayi zundu n kwa shakpei vinyan kpe nwo zundu.

25N yi sase lo nsaiyei n Zafun Gyi-gyi-yi iko yi, yi vi Zafun Gyi-gyi-yi ɓowun n yi asese vinya. 26Nnavun yi ta shan mwa-mwa zanshin akpeyiye na za ba nkwo ɓe nshewo yi nyim.